ꃭ ꇁ
ꁱꊿ：ꐛꆪꃴꉼ
ꀘꊿ：ꂽꌋꀈꇤ
ꅼꇻꀕꌠꄮꈉꒊꃀꈐꏭ
ꎺꏣꈘꆽꈘꄧꑠꈨꀉꄂꇬꊎ
ꒀꐰꅞꉎꅸꃅꇬꎷ
ꉢꀱꇊꀱꃅꎺꏣꋋꈨꅋꐯꇯꇬꎷ
ꄚꈐꏭꊷꆣꀕꑠꊭꀋꌋꀕꃅ
ꉢꄝꎙꇧꎭꇬꎷꅊꇈ
ꉠꀉꂿꌋꐓꌋꀺꌋꎳꄉ
ꍹꉢꇢꄉꌠꃭꇁꀊꋨꈬ
ꀃꑍꋋꄮꉢꄝꇿꊰꇈꀋꐚ
ꀊꋨꄮꇬ
ꃭꇁꋋꈬꉡꐊꎆꆫꁍꇬꄉ
ꈁꄽꏮꃯꏿ
ꏹꐚꏽ
ꐙꄏꌍꆽꄮ
ꋋꆹꉠꅿꑌꐋꀀꐋꃅ
ꀊꋨꄮꇬ
ꃅꆳꀑꈑꃅꄉꀄꂼꈁꄽꑌ
ꉢꂻꇫꎭꋺ
ꃭꇁ，ꉌꂵꈐꇬꁨꑭꊷꆣꀕꑠꌅ
ꉌꐒꇁꎭꄮꇬꇁꑠꌅ
ꀍꇓꑓꃬꄮꇬꇁꑠꌅ
ꈠꆺꈂꀸꐮꐷꄮꇬꇁꑠꌅ
ꇀꅉꇀꅉꃅ，ꁦꅉꁦꅉꃅ
ꃭꇁꐛꃆꐛꂮ
ꁯꒌꁭꒌꃅꐙꇁꀐꅊꇈ
ꃭꇁ，ꉂꏣꎵꑳꀕ，ꑆꊋꅡꊪꀕ
ꉠꉌꂵꇓꂵꌟꃅꏷꄫꀕ
ꐛꀋꌒꐨꏃꃅꒊꊝꂋꃅꂋꆘꅝ
ꃭꇁ，ꆎꆹꆈꌠꌺꇖ
ꍔꇁꑋꅉꃅ
ꍔꇁꈚꅉꃅꍔꇁꀀꅉꃅꌠꈧꌺꂷ
ꃅꑌꃅꎸꃅꍵꃅꋆ
ꈍꑋꆏꁨꉌꂵꇭꀧꃅꊷꆣꀕꀋꐚ
ꅽꌦꅪꈐꏭꉠꀎꋏꌦꅪꄄꍻꀕ
ꅽꃷꅍꆊꑌꈐꏭꉠꀎꋏ
ꀑꁮꅺꐳꑓꋪꑠꋒ
ꏷꌬꀕꃅꉢꂿꇁ
